លោកជំទាវ Flerida Ann Camille p. Mayo ឯកអគ្គរដ្ឋទូតសាធារណរដ្ឋហ្វីលីពីនប្រចាំព្រះរាជាណាចក្រកម្ពុជា បានបង្ហាញនូវបំណង ធ្វើឱ្យមានការហោះហើរត្រង់ពីប្រទេសហ្វីលីពីនមកកាន់ខេត្តសៀមរាប ដោយក្នុងពេលខាងមុខឆាប់ៗនេះ។

ការបង្ហាញនេះធ្វើឡើងក្នុងឱកាស ឯកឧត្តម​ ប្រាក់​ សោភ័ណ​ អភិ​បាល​ នៃគណៈអភិបាលខេត្តសៀមរាប បានអនុញ្ញាតឱ្យលោកជំទាវ Flerida Ann Camille p. Mayo ចូលជួបសម្តែងការគួរសម និងពិភាក្សាការងារ នៅសាលាខេត្តសៀមរាប។ ក្នុងជំនួបនេះដែរលោកជំទាវបានបញ្ជាក់ថា​នឹងធ្វើការពិភាក្សាផ្ទាល់ជាមួយអាកាសចរ CEBU PACIFIC AIRLINE ដើម្បីសិក្សាអំពីការហោះហើរត្រង់មកកាន់ខេត្តសៀមរាប។ 

ជាមួយគ្នានេះដែរ ឯកឧត្តម ប្រាក់ សោភ័ណ បានស្នើសុំទៅភាគីហ្វីលីភីនឱ្យមានការភ្ជាប់ទំនាក់ទំនងសម្ព័ន្ធមេត្រីភាពរវាងខេត្តសៀមរាប ជាមួយខេត្តសេប៊ូ (CEBU) របស់ប្រទេសហ្វីលីពីន ដែលជាខេត្តមានសក្តានុពលនាំមុខផ្នែកទេសចរណ៍របស់ហ្វីលីពីន រួមជាមួយនឹងការរីកចម្រើនក្នុងវិស័យម្ហូបអាហារ ភេសជ្ជៈ និងក្រុមហ៊ុនវិនិយោគផ្សេងៗទៀតដែលអាចមកវិនិយោគនៅខេត្តសៀមរាបផ្ទាល់។ អភិបាលខេត្តសៀមរាបបានសម្តែងក្តីសោមនស្សរីករាយចំពោះការលើកឡើងរបស់លោកជំទាវ និង បន្តចូលរួមក្នុងកិច្ចសហប្រតិបត្តិការ ជំរុញក្នុងវិស័យទេសចរណ៍ វិនិយោគ និងការចងសម្ព័ន្ធមេត្រីភាពរវាងខេត្តសៀមរាប និងខេត្តសេប៊ូ ដើម្បីឱ្យចេញជាលទ្ធផលផ្លែផ្កាសម្រាប់ជាប្រយោជន៍របស់ប្រជាជនខេត្តសៀមរាប និងប្រជាជនហ្វីលីពីន៕

សម្របសម្រួលដោយ៖ ផល្លីកា