សម្រាប់ព្រឹត្តិការណ៍ព័ត៌មានថ្មីៗប្រចាំថ្ងៃនេះរួមមាន៖

១.​ សម្ដេចធិបតី លើកទឹកចិត្តដល់សមាគមសម្ព័ន្ធខ្មែរ-ចិននៅកម្ពុជា ពិនិត្យលទ្ធភាពបណ្ដាក់ទុនវិនិយោគនៅបណ្ដាខេត្តតាមព្រំដែន ជាពិសេសខេត្តភាគឦសាន

ថ្លែងក្នុងជំនួបសំណេះសំណាលជាមួយគណៈប្រតិភូសមាគមសម្ព័ន្ធខ្មែរ-ចិននៅកម្ពុជា សម្ដេចធិបតី ហ៊ុន ម៉ាណែត នាយករដ្ឋមន្រ្តីកម្ពុជា បានលើកទឹកចិត្តដល់សមាគមសម្ព័ន្ធខ្មែរ-ចិននៅកម្ពុជា ពិនិត្យលទ្ធភាពថែមទៀតដើម្បីបណ្ដាក់ទុនវិនិយោគនៅតាមបណ្ដាខេត្តជាប់ព្រំដែន ជាពិសេសខេត្តភាគឦសាន។

២. រដ្ឋបាលរាជធានីភ្នំពេញកែសម្រួលកាលបរិច្ឆេទដឹកជញ្ជូនកម្មករ និយោជិត និងប្រជាពលរដ្ឋធ្វើដំណើរទៅស្រុកកំណើតក្នុងឱកាសពិធីបុណ្យភ្ជុំបិណ្ឌ

រដ្ឋបាលរាជធានីភ្នំពេញកែសម្រួលកាលបរិច្ឆេទ ដឹកជញ្ជូនបងប្អូនកម្មករនិយោជិត និងប្រជាពលរដ្ឋ ក្នុងការធ្វើដំណើរ ទៅលេងស្រុកកំណើត ជាពិសេសទៅលេងកម្សាន្តនៅតាមបណ្តាខេត្តភាគឦសាន ក្នុងឱកាស ពិធីបុណ្យភ្ជុំបិណ្ឌ ប្រពៃណីជាតិខ្មែរ។

៣.ម្ហូបអាហារ នំចំណី​ជិត១០០មុខ បានដាក់ជូនភ្ញៀវទេសចរភ្លក់ដោយឥតគិតថ្លៃនៅតំបន់ផាប់ស្រ្ទីត

ក្នុងតំបន់ផាប់ស្រ្ទីត​នាទី​ក្រុង​សៀមរាប មានការដាក់តាំងម្ហូបអាហារនំចំណីមកពីហាងល្បីៗក្នុងខេត្តសៀមរាបជិត១០០ ជូនភ្ញៀវទេសចរជាតិ និងអន្តរជាតិភ្លក់ក្នុងឱកាសទិវាទេសចរណ៍ពិភពលោក។

៤. ក្រសួងអប់រំ ធ្វើសន្និសីទសារព័ត៌មាន ដើម្បីផ្សព្វផ្សាយឲ្យទូលំទូលាយ និងគ្រប់ជ្រុងជ្រោយ ពាក់ព័ន្ធនឹងការប្រឡងបាក់ឌុប ឆ្នាំ២០២៤

ឯកឧត្តម បណ្ឌិត សភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួង អប់រំ យុវជន និងកីឡា បានទទួលជួបអ្នកសារព័ត៌មាន និងផ្តល់បទសម្ភាសន៍ ក្នុងសន្និសីទសារព័ត៌មាន ស្តីពីដំណើរការរៀបចំការប្រឡងសញ្ញាបត្រមធ្យមសិក្សាទុតិយភូមិសម័យប្រឡង៖ ០៨ តុលា ២០២៤។ 

៥. នាយករដ្ឋមន្ត្រីថៃ Paetongtarn Shinawatra ចុះពិនិត្យស្ថានភាពសហគមន៍ដែលរងផលប៉ះពាល់ដោយទឹកជំនន់នៅស្រុក Mae Sai នៃខេត្ត Chiang Rai ដោយផ្ទាល់

នាយករដ្ឋមន្ត្រីថៃ Paetongtarn Shinawatra ចុះពិនិត្យស្ថានភាពសហគមន៍ដែលរងផលប៉ះពាល់ដោយទឹកជំនន់នៅស្រុក Mae Sai នៃខេត្ត Chiang Rai ដោយផ្ទាល់នៅព្រឹកថ្ងៃទី២៨ ខែកញ្ញានេះ ខណៈផ្លូវធំៗចំនួន២៤ នៅតែស្ថិតក្រោមស្រទាប់ភក់ដ៏ក្រាស់ ហើយប្រតិបត្តិការសម្អាតត្រូវបានគេរំពឹងថានឹងមានរយៈពេលយ៉ាងយូររហូតដល់ខែតុលា។

៦. មនុស្ស៥៤នាក់បានភៀសខ្លួនទៅលើដំបូលមន្ទីរពេទ្យ Tennessee ដោយសារទឹកជំនន់មកលឿនពេក

ព្យុះសង្ឃរា Helene បានបន្សល់ទុកឲ្យផ្លូវថ្នល់នានាក្លាយជាទន្លេ ក្រោយពីវាបានបំផ្លិចបំផ្លាញបែបទ្រង់ទ្រាយធំនៅទូទាំងរដ្ឋផ្លរីដា និងភាគអាគ្នេយ៍សហរដ្ឋអាមេរិកកាលពីថ្ងៃសុក្រនេះ ហើយវាក៏បានសម្លាប់មនុស្សយ៉ាងហោចណាស់៤៤នាក់

៧. យុវជនឆ្នើមកម្ពុជាទី១ បានបញ្ចប់ការសិក្សា នៅសាលារាជបណ្ឌិត្យសភាយោធា អតីតព្រះមហាក្សត្រី Alizabeth ទី២ នៃចក្រភពអង់គ្លេស

ណាល់ ដារិទ្ធ ដែលជាកូនប្រុសរបស់ ឯកឧត្តមបណ្ឌិត ម៉ៅ ហាវណ្ណាល់ រដ្ឋមន្ត្រីទទួលបន្ទុករដ្ឋលេខាធិការដ្ឋានអាកាសចរណ៍ស៊ីវិល បានបញ្ចប់ការសិក្សាដោយជោគជ័យពី សាលារាជ្យបណ្ឌិត្យយោធាអតីតព្រះមហាក្សត្រី Alizabethទី2 របស់ចក្រភពអង់គ្លេស។

៨. គ្រាប់ស្វាយចន្ទី សំបុកត្រចៀកកាំ និងដំឡូងមីរបស់កម្ពុជា អាចនាំចេញដោយផ្ទាល់ទៅប្រទេសចិន

សមាគមស្វាយចន្ទីកម្ពុជា សមាគមត្រចៀកកាំខ្មែរ និងសមាគមសម្ព័ន្ធដំឡូងមីកម្ពុជាកាលពីថ្ងៃទី ២៦ ខែកញ្ញា ឆ្នាំ ២០២៤ បានចុះអនុស្សរណៈយោគយល់ (MoU) ជាមួយរដ្ឋបាលគយចិន នៅទីក្រុងណាននីង ខេត្តគ័ងស៊ី ប្រទេសចិន ដែលតាមរយៈការចុះហត្ថលេខានេះ គ្រាប់ស្វាយចន្ទី សំបុកត្រចៀកកាំ និងដំឡូងមី របស់កម្ពុជាអាចនាំចេញដោយផ្ទាល់ទៅកាន់ប្រទេសចិន។

៩. អន្សមខ្មែរក៏បង្ហាញពីអត្តសញ្ញាណមួយរបស់យើងដែរ ព្រោះថានំនេះគេនិយមវេចតែរដូវបុណ្យភ្ជុំ

បើយើងនិយាយពីនំអន្សម ប្រទេសក្នុងតំបន់អាស៑ានយើងក៏មានវេចនំស្រដៀងនិងនំអន្សមយើងដែរ គ្រាន់តែរសជាតិនិងគ្រឿងផ្សំផ្សេងគ្នា។ យ៉ាងណាអន្សមខ្មែរក៏បង្ហាញពីអត្តសញ្ញាណមួយរបស់យើងដែរ ព្រោះថានំនេះគេនិយមវេចតែរដូវបុណ្យភ្ជុំ។

១០. ទីក្រុង Beirut មានផ្សែងហ៊ុយខ្មួរខ្មាញ់ក្រោយយោធាអ៊ីស្រាអែលសម្រុកវាយប្រហារទាំងព្រឹកព្រលឹមថ្ងៃសៅរ៍នេះ

ផ្សែងហ៊ុយទ្រលោមពាសពេញទីក្រុងបៃរូត និងជាយក្រុងប្រទេសលីបង់កាលពីព្រឹកថ្ងៃសៅរ៍ បន្ទាប់ពីតំបន់មួយនេះបានរងហេតុការវាយប្រហារពេញមួយយប់ដោយសារសកម្មភាពវាយប្រហារតាមដែនអាកាសយ៉ាងធ្ងន់ធ្ងររបស់យោធាអ៊ីស្រាអែល។