ប្រធានាធិបតីសហរដ្ឋអាមេរិក លោក Joe Biden បាននិយាយនៅថ្ងៃចន្ទ ម៉ោងនៅក្នុងស្រុកថា លោកនឹងធ្វើដំណើរទៅកាន់រដ្ឋ North Carolina នៅថ្ងៃពុធ ដើម្បីពិនិត្យមើលពីស្ថានភាព និងធ្វើបទសម្ភាសន៍សង្ខេបស្ទាបស្ទង់ពីលើអាកាសក្រោយពីទីក្រុង Asheville ត្រូវបានរងការបំផ្លិចបំផ្លាញយ៉ាងធ្ងន់ធ្ងរដោយព្យុះសង្ឃរាHelene។   ជុំវិញដំណើរចុះមើលស្ថានភាពក្នុងរដ្ឋNorth Carolina នេះ លោក Biden ក៏បានបញ្ជាក់បន្ថែមថា លោកនឹងធ្វើដំណើរទៅកាន់ទីក្រុង Raleigh ជាមុន ដើម្បីសិក្សា និងស្វែងយល់អំពីព័ត៌មានសង្ខេបផ្សេងៗនៃតំបន់រងគ្រោះពីមន្ត្រីរដ្ឋ និងក្នុងតំបន់ ជាមុនសិន ទើបធ្វើដំណើរតាមអាកាសទៅកាន់ទីក្រុង Asheville ជាក្រោយ។

យ៉ាងណាមិញ លោក Joe Biden បានប្រកាសពីផែនការសម្រាប់ការធ្វើដំណើរនេះ បន្ទាប់ពីទទួលបានព័ត៌មានពាក់ព័ន្ធនឹងផលប៉ះពាល់ដែលទទួលរងដោយខ្យល់ព្យុះ និងកិច្ចខិតខំប្រឹងប្រែងសង្គ្រោះពីមន្ត្រីរដ្ឋាភិបាលសហព័ន្ធ និងអភិបាលរដ្ឋ North Carolina លោក Roy Cooper ដែលបានធ្វើដំណើរតាមអាកាសទៅដល់តំបន់Asheville ដែលជាតំបន់រងគ្រោះរួចមក កាលពីថ្ងៃចន្ទ។

បន្ថែមពីនេះ លោក Biden ក៏បាននិយាយថា លោកមានគម្រោងទៅសង្កេតមើលពីស្ថានភាពនៃសហគមន៍ដែលរងផលប៉ះពាល់ដោយខ្យល់ព្យុះនៅរដ្ឋ Georgia និង Florida ឱ្យបានកាន់តែឆាប់តាមដែលអាចធ្វើទៅបាន។ ហើយលោកក៏បានប្រតិកម្មយ៉ាងខ្លាំង ចំពោះការអះអាងរបស់អតីតប្រធានាធិបតី Donald Trump ដែលថារដ្ឋបាលរបស់លោកមិនអើពើនឹងគ្រោះមហន្តរាយនេះក្នុងថ្ងៃតែមួយផងដែរ៕