អាជ្ញាធរការពារអ្នកប្រើប្រាស់ថៃបានចាប់ខ្លួនគូស្នេហ៍តារាអនឡាញមួយគូ ដោយចោទប្រកាន់ពួកគេពីបទក្លែងបន្លំ និងផ្សព្វផ្សាយការផ្សាយពាណិជ្ជកម្មមិនពិតដែលអាចប៉ះពាល់ដល់អ្នកប្រើប្រាស់។ប៉ូលិស​បាន​ចាប់ខ្លួន​ប្តី​ប្រពន្ធ​ឈ្មោះ Kornkanok Suwanbut ហៅ​ថា Mae Tak និង​ប្តី Kanpon Rueangaram និង​បាន​ឆែកឆេរ​លំនៅដ្ឋាន​ ដើម្បី​រក​ភស្តុតាង​បន្ថែម ខណៈគូស្នេហ៍មួយគូនេះក៏បានបើកហាងមាសមួយកន្លែងក្នុងសង្កាត់ Khong Sam Wa នៃទីក្រុងបាងកក ហើយតែងផ្សាយបន្តផ្ទាល់លក់តាមអ៊ីនធឺណិត ដោយថាមានគ្រឿងលម្អមាសក្រោមស្តង់ដារក្នុងតម្លៃសមរម្យ។ការឃាត់ខ្លួនធ្វើឡើងបន្ទាប់ពី មានជនរងគ្រោះដែលធ្លាប់បាន​ទិញ​មាស​ពី​ហាង Mae Tak ខាងលើនេះ ​ ​បាន​ដាក់​ពាក្យ​បណ្តឹង​ទៅ​ស្ថាប័ន​ពាក់ព័ន្ធ ដោយសារហាងមាសដទៃទៀតមិនទទួលទិញមាសដែលពួកគេបានទិញពីហាង​ Mae Tak ដោយថាជាមាសមិនសុទ្ធ។ក្រោយការឆែកឆេរ កម្លាំងនគរបាលនាយកដ្ឋានប្រឆាំងបទល្មើសសេដ្ឋកិច្ចបានឃាត់ខ្លួនអ្នកទាំង២ ទៅផ្តល់ចម្លើយ និងឃុំខ្លួនបណ្តោះអាសន្ន​ ខណៈជាប់ទោសចំនួន៤ករណី គឺចោទប្រកាន់ពីបទសមគំនិត ក្លែងបន្លំសាធារណៈជន បន្លំឯកសារលក់ រួមគ្នាមានបំណងបង្កឱ្យមានការយល់ច្រឡំទាក់ទងនឹងប្រភពដើម លក្ខខណ្ឌ គុណភាព បរិមាណ ឬបញ្ហាសំខាន់ៗផ្សេងទៀតទាក់ទងនឹងផលិតផល ឬសេវាកម្ម និងការផ្សព្វផ្សាយដែលខុសពីការពិត៕

សម្របសម្រួលអត្ថបទដោយ៖ ផល្លីកា