លោក Tommy Kim ប្រធាន IPCC Kun Khmer បានបង្ហោះលើបណ្ដាញសង្គមហ្វេសបុករបស់ខ្លួន កាលពីថ្ងៃម្សិលមិញថា លោកបានឃើញការផុសរបស់អ្នកលេងជង្គង់ពិស ប៊ុន សុធា អំពីកីឡាកររុស្សីម្នាក់ ដែលទើបប្រកួតជាមួយរូបគេសន្លប់ក្នុងទឹកទី១ ហេតុអ្វីបានជាប្រធានចាប់គូប្រកួត តម្រូវឲ្យកីឡាបរទេសដែលចាញ់ក្រោមស្នៀតរបស់ប៊ុន សុធា ត្រូវប៉ះជាមួយកីឡាករ អេ អាំម៉ារីន។ 

ឆ្លើយតបទៅនឹងឃ្លាដែលបានលើកឡើងពីប៊ុន សុធា និងបណ្ដាអ្នករិះគន់លើបណ្ដាញសង្គមហ្វេសបុក លោក Tommy Kim បានបញ្ជាក់ថា ការប្រកួតនេះ គឺមានរយះពេល 8ខែរួចមកហើយ ដូច្នេះការហ្វឹកហាត់ ការឡើងគីឡូ របស់កីឡាករម្នាក់ៗ ក៏មានការប្រែប្រួលផងដែរ ឬមួយកីឡាករម្នាក់ដែលធ្លាប់វាយចាញ់ហើយ ត្រូវបានហាមឡើងប្រកួតអស់មួយជីវិតឬ?

លោកបានបញ្ជាក់អំពីមូលហេតុបន្ថែមថា កីឡាករ អេ អាំម៉ារីន គឺត្រូវបានមកជំនួសអ្នកលេងគុនខ្មែរផ្សេងទៀតទេ ដោយសារកីឡាករគុនខ្មែរម្នាក់ ដែលលោកបានចាប់គូរមកយូរហើយ ត្រូវមានការប្រែប្រួលមិនឡើងប្រកួតវិញ ទើបលោកតម្រូវ ដាក់ឱ្យកីឡាករ អេ អាំម៉ារីនមកជំនួសទាំងតក់ក្រហល់បែបនេះ។ 

លោក Tommy Kim បានលើកឡើងយ៉ាងដូច្នេះថា៖ “យោងតាមមតិបងប្អូនដែលស្រលាញ់និងគាំទ្រគុនខ្មែរ ខ្ញុំសំរេចប្តូរកីឡាកររូបនេះចេញដោយរៀបអ្នកថ្មីមកជំនួសវិញ ខ្ញុំសូមអភ័យទោសនិងអរគុណចំពោះការគាំទ្រនិងស្រលាញ់របស់បងប្អូនអ្នកគាំទ្រគុនខ្មែរ បេះដូងអ្នកគាំទ្រគុនខ្មែរ គឺជាបេះដូងរបស់ខ្ញុំ៕