កម្លាំងអង្គភាពCMAC បានបោសសម្អាតតំបន់រងផលប៉ះពាល់ដោយសារសង្គ្រាម​២៤-២៨​ ខែកក្កដា​ ឆ្នាំ២០២៥​ ជាតំបន់គ្រាប់បែកចង្កោម​ ស្ថិតនៅភូមិតាមាន់សែនជ័យ​ ឃុំគោកមន ស្រុកបន្ទាយអំពិល ខេត្តឧត្តរមានជ័យ បានរុករកឃើញគ្រាប់បែកចង្កោមចំនួន២៥គ្រាប់ ប្រភេទM46 បាញ់ចេញពីគ្រាប់កាំភ្លើងធំ ១៥៥មម។​ នេះបើតាមការលើកឡើងរបស់ ឯកឧត្តម ហេង រតនា ប្រតិភូរាជរដ្ឋាភិបាលទទួលបន្ទុកជាអគ្គនាយកស៊ីម៉ាក់ ដែលប្រតិបត្តិការនេះធ្វើឡើងកាលពីថ្ងៃទី១-២​ ខែធ្នូ​ ឆ្នាំ ២០២៥នេះ​។ អគ្គនាយកស៊ីម៉ាក់​ ក៏បញ្ជាក់ផងដែរថា ក្រៅពីអនុសញ្ញាអន្តរជាតិនៃការហាមឃាត់ប្រើប្រាស់អាវុធនុយក្លេអ៊ែរ​ មានអនុសញ្ញាអន្តរជាតិសំខាន់ៗចំនួន៣ទៀតត្រូវបានអន្តរជាតិរួមគ្នាហាមឃាត់និងរឹតបន្តឹងហាមប្រើប្រាស់ក្នុងការធ្វើសង្គ្រាមរួមមាន៖ ១.​ អនុសញ្ញាអន្តរជាតិហាមឃាត់ការប្រើប្រាស់អាវុធគីមី​(កម្ពុជា+ថៃ)​ ជារដ្ឋភាគី​។, ២.​ អនុសញ្ញាអន្តរជាតិហាមឃាត់ការប្រើប្រាស់គ្រាប់បែកចង្កោម​ (កម្ពុជា+ថៃ)​ មិនមែនជារដ្ឋភាគី​ ប៉ុន្តែកម្ពុជាមិនបានប្រើប្រាស់ក្នុងសង្គ្រាមជាមួយថៃឡេីយ​ រីឯថៃបានប្រើប្រាស់មកលើកម្ពុជា។ និង៣.​ អនុសញ្ញាអន្តរជាតិហាមឃាត់ការប្រេីប្រាស់គ្រាប់មីនប្រឆាំងមនុស្ស​(កម្ពុជា+ថៃ)​ ជារដ្ឋភាគី។ឆ្លៀតឱកាសនេះ​ ឯកឧត្តម ហេង រតនា ក៏បានអំពាវនាវដល់ប្រជាពលរដ្ឋនៅតំបន់រងផលប៉ះពាល់ដោយសារសង្គ្រាមជាមួយថៃទាំង៧៧ភូមិ​ នៅខេត្តឧត្តរមានជ័យ​ និងខេត្តព្រះវិហារ​ មេត្តាប្រុងប្រយត្ន័ខ្ពស់បំផុតជាមួយគ្រាប់បែកចង្កោមជាសំណល់សង្គ្រាមថ្មីៗនេះ​។ សូមរំលឹកថា​ កាលពីថ្ងៃទី២៥​ ខែតុលា​ កន្លងទៅនេះ​ មានកុមារាអាយុ១០ឆ្នាំម្នាក់បានផ្ទុះគ្រាប់បែកចង្កោមបែបនេះស្លាប់និងឪពុករងរបួសធ្ងន់ធ្ងរផងដែរ៕