ស្នងការដ្ឋាននគរបាលខេត្តមណ្ឌលគិរី បានទទួលសត្វខ្លាដំបងចំនួន ០២ក្បាល ប្រគល់ជូនអាជ្ញាធរ ដោយមានគោលបំណងចូលរួមអភិរក្ស និងថែរក្សាសត្វព្រៃ ដែលជាធនធានធម្មជាតិដ៏មានតម្លៃរបស់ជាតិ ដោយមិនបានបញ្ជាក់ថាខ្លាព្រៃដំបង២ក្បាល នោះបានពីប្រភពណាណោះទេ។

ពិធីប្រគល់សត្វព្រៃនេះ បានប្រព្រឹត្តទៅក្រោមអធិបតីភាពដ៏ខ្ពង់ខ្ពស់របស់ លោក ឧត្តមសេនីយ៍ទោ ឡោ សុខា ស្នងការនគរបាលខេត្តមណ្ឌលគិរី នៅថ្ងៃទី១៩ ខែមករា ឆ្នាំ២០២៦ ដោយបានយកសត្វខ្លាដំបងទាំង ០២ក្បាល ទៅប្រគល់ជូនមន្ត្រីជំនាញនៃមន្ទីរកសិកម្ម រុក្ខាប្រមាញ់ និងនេសាទខេត្តមណ្ឌលគិរី ដើម្បីបន្តថែរក្សា និងគ្រប់គ្រងតាមនីតិវិធីច្បាប់ជាធរមាន។បើតាមការបញ្ជាក់របស់ លោកជំទាវ អ៊ឹម រចនា អនុរដ្ឋលេខាធិការ ក្រសួងកសិកម្ម រុក្ខាប្រមាញ់ និងនេសាទ បានឲ្យដឹងថា ក្នុងចំណោមខ្លាទាំង ២ក្បាលនេះ មានឈ្មោល និងញី ចំពោះខ្លាឈ្មោលមានទម្ងន់ ៦០គីឡូក្រាម អាយុប្រហែល ៩ខែ ចំណែកខ្លាញីមានទម្ងន់៤០គីឡូក្រាម អាយុប្រមាណជា ៦ខែ ឥលូវនេះសួនសត្វភ្នំតាម៉ៅបានរៀបចំទ្រុងដាក់ស្រួសបួល និងពិនិត្រមើលតាមដានសុខភាពបន្ត ក្នុងករណីមានបញ្ហាសុខភាពណាមួយខាងសួនសត្វជួយអន្ដាគមន៍ព្យាបាលទាន់ពេលវេលាផងដែរ៕